A proposta escénica de 7 Contos Capitais (Historias para pícaros adultos) parte dun texto de Marcelino de Santiago (Kukas) que tomando como pretexto a representación dos sete pecados capitais a cargo das marionetas - artistas do Centro Traumático Galego Gaiteiro de Monicreques vai desenrolando diferentes historias que mesturan a realidade da propia compañía teatral de monicreques coa representación irónica, divertida e crítica que fan dos pecados capitais para rematar cunha pequena homenaxe ó poeta Curros Enríquez. Todo un elenco de artistas de cartón pedra e madeira mostraran a súa face máis expresionista para divertirnos co seu humor de ácido sarcasmo e retranca co que recuperamos un dos aspectos máis tradicionais do teatro con marionetas, o seu carácter de crítica e sátira social.

        Cando nos propuxemos montar un novo espectáculo tivemos en conta unha serie de factores que respondesen tanto ós criterios estéticos e éticos da compañía como ós puramente empresariais e de incidencia da nosa empresa na apertura e asentamento de novas vías de mercado.

         Nun momento no que temos en cartel varios espectáculos dirixidos ó público infantil, xuvenil e familiar (o que poderíamos dar en chamar tódolos públicos), cremos que é un momento axeitado para crear e producir un espectáculo de monicreques dirixido ó público adulto, o que responde dunha banda a necesidade de reflexionar e dar unha visión satírica do mundo que nos rodea utilizando unha linguaxe e uns recursos expresivos propios do mundo adulto, e doutra a asentar o traballo da compañía no mercado do teatro para adultos.

         Sabemos que hoxe en día, aínda que noutros tempos pasados non foi así, en certos círculos da programación e promoción cultural é case que un tópico pensar que o teatro con marionetas é só para nenos, pero a realidade, pensamos, que desminte a este tópico, e aínda que as veces hai que loitar contra muíños de vento, a nosa propia experiencia nos recorda que algúns dos espectáculos que creamos para adultos non só tiveron unha boa acollida de crítica e público, senón que tiveron unha satisfactoria distribución, estamos a falar de A Rúa das balconadas, O Mariscal, Unha noite no Pórtico do Paraíso ou mesmo Galiza Máxica.

         Evidentemente a distribución dun espectáculo con marionetas dirixido a adultos precisa dun esforzo engadido para rachar con tópicos naqueles programadores menos abertos, pero ó mesmo tempo nos anima a traballar no asentamento da compañía en espazos e festivais nos que cada vez máis se demandan espectáculos con obxectos e bonecos para maiores así como espectáculos satíricos.

Deus                                        A. Teo Calamar

Sra. Marquesa                                              Maruxa de Román – Nones

Pobre Pobrísimo                                                               Sr. Penadades

Canciño                                                                                   Can de Palleiro

Pretiño                                                                                              P. Branco de Negreira

Crego                                                                                                         Pai Larouco

Trosma 1                                                                                                              Jari Crisma

Trosma 2                                                                                                                        Frank Abade

Trosma 3                                                                                                                        Mojamé Quinto

Gardacevil                                                                                                                      Jose María Becerril

Moza                                                                                                                              Olinda Espantoso

Srta. Anastasia                                                                                                                Srta. Casimira

Doutor Zylevinzky                                                                                                Trilita Molotof

Chouchiño                                                     Pánfilo de Parvaez